如果係南澳已有穩定工作，恭喜你，這篇文章未必岩啱你睇。但亦有好多人未必咁好彩，花幾個月至半年時間搵長工大有人在。南澳同香港一樣，都有 UberEat / Deliveroo 等外送服務，唔想搵工期間坐食山崩，做住先又得唔得呢？入職要求高唔高？收入好唔好呢？難唔難做？會有好多前期投資嗎？小弟就係度身先士卒，試下幫大家解答下以上問題。
申請
如果想去 AusPost 做送件，一係你識人介紹，一係就係見工，由於實在太缺人，只要你勤勤力力，朝朝五點幾起身去送既話，要入行不太難。不過如果連工都唔想見，想立即可以返工，就可以試下 UberEat / Deliveroo / Menulog / Doordash，這些公司係唔洗見工，只需要 Download 左佢地既手機 App 或者網上做登記，申請一個 ABN (澳洲商業登記號碼，唔洗錢)，上載埋你既個人資料 (好似車牌呀、自己個樣、Passport、銀行戶口資料)，同埋授權佢哋幫你做 Police Check, 基本上兩三日就攪掂，可以開工。Menulog 會要求你有個 Hotbag, 係佢地個度買大約 40澳元左右（算係幾抵）其他好似無規定一定要。如果無車的話，亦可以用單車送。無論你用邊間都差唔多，因為 UberEat / Deliveroo 個啲多人用，但 Driver 一樣多，我就試左申請岩岩係南澳拓展業務既 Doordash，用手機 App 一口氣攪掂所有手續，好快手第二日已 Approve 左可以開工。
開工
繁忙時段早午晚餐都有，開車去 busy zone 後 online 就可以開工，Hotzone 會不停變，你只要開到佢地附近兩三公里就得，電腦會跟據你既位置同過往派送既 Performance 黎派單俾你，收到後係一分鐘內 Accept 就得。頭幾次會有啲緊張，原因係個 app 會希望你係限期前到達店內取貨，但岩岩黎到南澳人生路不熟，大大間 Chemist Warehouse / KFC / McDonald / Hungry Jack 就話離遠都望到，但小店就未必可以一眼就知道食店係邊，好彩啲 order 來來去去都係個幾間，好快就會習慣，就算係最繁忙嘅市中心，佢地都會指你去 Loading Zone 停車（如果無指明的話，南澳普通私家車可以停10分鐘），所以無論係邊區取貨／餐都唔難做，跟住手機指示，佢叫你 show order number 就 show 俾店員，叫你 Scan barcode 就照做，然後上車跟住個 內置Google map (可以選 Waze 或 apple map)去到目的地，再跟指示影相 / Scan code／親手交俾客人就攪掂，實在係 Easy job，簡單到不行。每單 job 價錢都不一樣，基本上都係跟據送貨距離而定，送貨比送餐人工會高啲，不過基本上都係有單就接，我唔揀擇。
收入清況
斷斷續續續咁做咗六日，開始了解咩時段會多 order，咩時候同地方就算你 online 都未必有 Job, 到時你只能在車內食下野，飲下水，玩下手機或者順便行下商場，收入如下表，大家可以參考下。
- Active Time 係送貨時間，如果只計 Active Time，扣埋油費都有約 20/hr，都有最低工資，唔錯呀～
- Dash Time 就係由 online 個下就計，你見到其實都幾多等待既時間，因為有時你出左去外區，你都要花啲時間開返架車去 hotzone 先有單接，或者岩岩過左 busy hour，無人落 order，計埋嗰啲時間，人工就慘不忍睹。
個人心得
- 有啲食店會係門口寫住 No hotbag no delivery，所以安全起見起碼都帶個 cheap cheap Kmart 旅行保溫箱出去
- 我開住架 SUV 送貨，超食油，市區 1L 油只行 10-12公里，上表既 Gas Cost 係以油費 1.33/L 黎計，如果你用啲小車／Hybrid 送，會好好多
- 市中心泊車難少少，常常塞車，但多啲單，如果有 Crazy Taxi (Old game) 咁既身手，去市中心送就岩架啦，唔得就去東／南／北區啦，易泊車但少啲單
- 如果想做早更，唔好遲過10點開工，因為會太多人 online 接晒啲單，你連想送既機會都無，(９月１４日我就係咁既情況，太遲上線，想 online 都唔得，最後等左成個幾鐘先可以上。
- 由於你係自己開公司 (有ABN)，所以日後報稅又會多一啲野要做，如果係找 Tax agent 幫你報既話開支又會貴啲，所以要好似我咁記下所有開車記錄，我係 online 後影低車既 ODO, offline 後又影一張相，用黎 keep record，方便日後報稅時用，因為係澳洲，開工送貨時，每公里係可以扣稅的 (其中一種計法係每公里 AU 0.72＠2021-2022，有上限)
- 星期六、日每單會加 AU 2-3，如果可以放棄陪伴家人，係可以賺多少少，但我就暫未試過
小結
咁既收入個人覺得真係勁少，長期咁唔係辦法，不過勝在唔洗見工，有車，有澳洲工作權，用現有保險就可以開工，亦可以順便親身了解南澳各區環境，有時去到海邊／山上見到啲美影，我都會停一停打下卡，享受下行下，感覺都唔錯。如果想收入多少少，亦可以試 Amazon Flex 既送件，每一個 4 – 5小時 block 送 4x 件貨收 $108 (你自己俾油費泊車費)，多數都係同區，佢地花 1x – 20日同你做 police check / driving history 後就可以做，小弟仲等緊 approval，日後有機會既話再同大家分享啦~
後記 (2021年9月27日)
早幾日試左做 UberEat，9:30分上線後等左十幾分鐘都無單，所以改返做 DoorDash 個半鐘先，然後約 11 點再試 UberEat，嚇我一跳，由上線一刻就有單，當你快完成手上個單時，個 App 已經會出定下一單問你接唔接，一直做到２點無停過，連停一停綁鞋帶或者飲水嘅時間都冇咁濟，啲 Job 多過 DoorDash，雖然每張單收入好似比 DoorDash 少，但由於密密食，同埋差不多每次都可以 pickup 兩個餐，慳返啲來回時間，每小時時薪扣油費後都有 20/hr 以上，所以如果睇錢份上，做 UberEat 可能會好啲，如果想 Relax 啲，做 DoorDash 都未嘗不可。
註
由現在起登記 Uber Driver，完成 40 單 Job，會有 AU 300 新人 Bonus (8小時我送左25次，應該好快達成)，介紹人都有得分，唔介意既話，可以用我個 Invite Code，多謝大家。